Paolo Carniello

Paolo Carniello, vive a Montegrotto Terme (PD), oltre che scrittore, (famoso il suo romanzo "QUETZAL Il Serpente Piumato") è un grande appassionato di culture Orientali, progetta giardini Giapponesi, colleziona  bonsai. Dalla sua raccolta di poesie: ECHI dall'ANIMA, per sua concessione, pubblichiamo queste in lingua Veneta.

  Fora dea Carezà     Davanti 'na Croze     Aria de Primavera     Che Beo

   Fora dea Carezà

Me metevo e sgalmare rivoltae de me nono
più moegate parché ciapae dentro el pisso de vaca.
Urtavo el porton dea staea tirà su col fil de fero,
e via de corsa coe soe che me tocava el cueo.
Via, via, el più distante possibile,
in fondo, in fondo al carezòn
fin che me s-ciopava el core.
Maedete e ortighe,
e me fazea saltare come un cavareto slatà
in mezzo ae ruare.
El cieo jera infogonà
e el soe, picà su suea forcea dei monti,
me riportava al disnare,
pien de tavanee e de beconi de sansae.
Quando, s-ciapi de stornei specià,
se muciava su, sue rame piegae del figaro,
el primo ciamo dea soeta
me tirava fin soto el porton,
suà, straco e za omo.

Torna all'inizio

  Davanti 'na Croze

Soto ea ombrìa grizi cipressi incancarii,
par metà imbragai de tressa giustissiera,
i me ga menà, piegai, fin al canceo.
Pian pianeo, caminando drio ea mura descrostà
birasangoe, sgiaonsei i se imbuzava spaentà,
ma soeo par finta
e curiosi i sbuzava fora poco pi' vanti.
Muceti de terra quèrti da erbassi e pissacani in fiore
chi co un bacheto piantà su,
chi co 'na croze butà eà e mastegà dai bai.
Fermo, drito, impiocà, mastego paroe sante
e ciàcoeo co chi gnanca conosso,
ma cossa importa,
tanto, soto do metri de colsara
i omeni xe tuti uguai.

Torna all'inizio

  Aria de Primavera

Ciucio gaeti che me beca ea lengua.
Da insima l'arzare vardo zo el bisson de aqua,
che se scaensa in mezzo ai campi
de oieto e spagna.
Formenti, a onde, el xe un mare in burasca,
aria sgionfa de primavera,
sentore che copa e snarise,
de campi apena arai e sparpanai
de loame stajonà.
In fondo, soe rive alte,
streje de albare che sluzega,
so ciapà da 'sto odor che no me moea.
Tempo de lussi in frega
e de pessegati piantai sul còro.
Tiree de vigne brombe de solfato e scalcagnae.
Me segna ea strada l'odore  de tera crua
e de boassa pestà e strassinà.

Torna all'inizio

     Che Beo

      Che beo 
saria camminare, sbrombo soto ea piova,
sensa curarse de altro;
cuciarse su 'na soca e spetare
el giorno che nasse e el giorno che more;
non saver né lezare né scrivare
e farse guidare dai veci e dal tempo.

      Che beo
vardare ea zente che se sgrafa
e se spenze in mezo ai afani
e far finta de gnente;
scoltare el sioeo dei ozei, i sighi dei boce
e e storie passie dei noni;
vardare foje che casca da stropari che dorme,
l'aqua intorcoeà soto el ponte, neve che cuerze,
fogo che bruza stoppie e fassine de Vecia,
bronze vive soto el camin;
imbriagarse de aria sgionfa de un matin de primavera.

      Che beo
ricordare e anime sperse,
stegoeàre fazoi soto el barco
ciàcoeando de tuto e de gnente,
scoltare tochi de batoci,
cantare veci stornei a 'na luna imbriaga,
inamorarse, farse s-ciopare el core nel pèto
e perdarse nei to oci;
caminare su l'arzare e rancurare fiori e pissacani
e fioi soto i cavoi;
ciapare a scarpà paure e vargogne,
dire tuto queo che se voe
e che te rumega int'el stomego
a parenti e a amissi;
moeare tuto e sparire come 'na scoreza nel vento.

      Che beo
avere l'animo dei vent'ani
anca se e piaghe e i ossi ne gà sento;
snanararse in mezo ae tete dea mama,
desmentegarse de respirare e spetare...
tanto el mondo gira eo stesso, da sempre;
imbamboearse davanti al soe che se smorsa sul mare;
afrontare de peto 'sta vita grama,
onta e dissipà.

      Che bruto
vardare in facia un omo che pianze,
voltarse e far finta de gnente...

Torna all'inizio

Torna a racconti

____________________________________________

Resio Veronese

Resio Veronese, Cavaliere della Repubblica Italiana, vive a Sant'Elena, autodidatta, conosciuto come "il poeta contadino" conservatore del dialetto veneto, ha partecipato a vari concorsi, distinguendosi anche tra i primi posti.
Dalla sua raccolta di poesie "Il Poeta Contadino" presentiamo alcune sue opere.

La man de la mama       Ani passà      El vin dei poareti

La man de la mama

A voria scrivare
dele paroe grande, grande
come queo ca penso
ma sol foio no le me sta drento.
Oncò mama che xè la to festa voria
voria vedare fiuri
so ogni balcon,
e quel fioo che de ti
el s'à desmentegà
el Signore ghè tochesse l'anema,
parché de mama una soo se ne ga.
Mama par merito tuo
so vegnù grande coi to sacrifici
te m'è vestio, epure mi a maapena
rieso a dirte on'orasion
adeso che te si col bon DIO.
Mama me sento così picoo
quando ca te penso, anca se adeso,
gò i fioi pì grandi de mi.
Quando ca me sveio a la note
e vago a vedare se tuti i xè in leto,
proprio aora sento de pì la to mancansa;
quea man che a la sera prima de indormesarme
soo tocandome i cavigi
me dasea sicuresa.

Torna all'inizio

   Ani passà

Me ricordo; me ricordo sì
quando piè descalso a corea
pai spagnari, pai loti;
sui albori me rampegava come el gato
me fasea la caseta là desora
el dì el passava so on'ora.
Quando el soe se scondea dedrio
l'upio pì grosso che la bina ghea;
te sentii el fis-ciare de me nono
che col fero da segare in spaa
el vegnea dai campi pa 'ndare in staa.
Al so sioio ghè rispondea el merlo
che da in meso el giavascaro
ciamava i altri a ponaro.
E quando el soe fiaco
iera tuto sol saco, tuto dormia
parché la matina scumisiava
on'ora prima ch'el sole fese la spìa.
Eh sì, me sento in colpa
tuto quel silensio, de note le stee
te podii contare.
A la luna i to segreti confidare.
Tuto questo cari noni oncò
no lo ghemo pì, valtri coi cai soe man
che gnianca pì le se sarava,
na feta de poenta e on fiasco
de vin ve bastava, e a festa se cantava.
Semo rivà noantri inteienti
come i mussi putini, semo messo la gravata
traturi e traturini, ghemo scumisià
coi diserbanti, par no intossicarse
a 'ndemo in leto cò tuta e guanti.
Ah cari noni
se se podesse tornare indrio
e cambiare sto mondo de novità
meteria valtri davanti
come che par mi
sì sempre sta.

Torna all'inizio

  El vin dei poareti
    (La graspìa)

Quando on tempo
anca el vin se misurava
no parché el fese mae
ma parché el costava
me Popà aora a na bota
el fondo el ghe cavava,
e dopo avere torcià e ritorcià
le graspe de friolaro,
coe man le specolava
e drento soa bota le butava
piè descalso, fin ch'el ghea fià
le pestava
parché le vegnesse pressà
quanto bastava.
Quatro toe a crose inciodà
co du grossi pieruni
dessora che le tegnea fracà,
de aqua l'inpinava la bote
e ogni dì, queo che le graspe
le bevea, lu co la secia el ghe metea.
E -sta tento- el me disea,
l'aqua soto dee toe
no la ga da 'ndare,
senò el forte o la mufa
le poe ciapare.
Quando in Febraro
el soe scumisiava
a fare oceto
tuti a laorare sol vigneto.
Schersando e cantando
la goa se secava
eco pronto el goto de graspìa
che la ristorava
e xo par el gargato
anca i pulmuni
la te rinfrescava.
Fin in Giugno e dopo,
el vin dei poareti
el durava.

Torna all'inizio

Torna a racconti

__________________________

Proverbi Veneti

A chi no ghe piase el vin , che Dio ghe toga l' aqua.
A sentir una sola campana se giudica mal
L'amor no ciapa ruzene
A donar e parlar se perde el merito
A tirarse massa indrio se finisse col culo in rio
A l'ostaria no vago, ma co ghe son ghe stago
A chi no vol far fadighe, el teren ghe produse ortighe
A un belo sempre ghe manca, a un bruto sempre ghe vanza
A sete ani i xe putei e a setanta ancora quei
I amissi se conosse alle fosse e alle nosse
A dir busie ocor bona memoria
A dir la verita' basta un cojon, ma a dir busie ghe vole un bricon
A robar poco se va in galera, a robar tanto se fa cariera
A chi nasse sfortuna', piove sul culo a star senta'
L'amor xe orbo
Bela coa, trista cavala
Ben far e paura no aver
Bisogna menare el dente, conforme uno se sente
Bisogna averghe i oci anca dedrio
I bei sogni xe longhi, i bei zorni xe curti
Basta na fontana a far dano a na osteria
Bisogna viver e lassar viver
Bisogna impissarghe 'na candela al diavolo e una a Sant'Antonio
Co l'eta l'omo el fa panza e la dona fa stomego
Co manca el mijo i osei se beca
Chi dixe dona dixe dano, chi dixe sposa dixe spesa
Can scotà de aqua calda ga paura dea  freda
Chi no ama le bestie no ama gnanca i cristiani
Chi da galina nasse, da galina ruspa
Co no ghe xe gambari, xe bone anca le zate
Caval, putana e persegar, trent'ani no i pol durar
Caval bianco e bela muger, da sempre pensier
Chi varda i fati dei altri, i soi va de mal
Chi ama, brama
Chi paga avanti el trato, servisio mal fato
Co'l cavejo tra al bianchin, lassa la dona e tiente el vin
Chi no ga fame, o l'e' mala' o l'ha magna'
Contro la forza no val razon
Co capita un bocon, mona chi no ne aprofita
Compare de anelo, pare del primo putelo
Caval vecio e servitor cogion, no ingana el paron
Chi no me vol no me merita
Can no magna can
Co l'ovo deventa vecio, i cani ghe pissa adosso
Chi vole el pomo sbasa la rama, chi vol la tosa careza la mama
Co nasse i xe tuti bei, co i se marida i xe tuti richi, co i more i xe tuti boni
I cani mostra i coioni, i coioni mostra i schei
Co se xe in balo, bisogna balar
Chi guerna la so pel, guerna un bel castel
Chi zerca de far la busa ai altri, la fa a se stesi
Co se barata, uno ride e l'altro se grata
Co parla na bela dona la ga sempre rason
Co se ga da pagar se trova tuti, co se ga da tirar no se trova nissun
Chi roba se fa siori
Chi prima no pensa, dopo sospira
Chi no xe bon de romparse el pan, no xe bon de guadagnarsene
Consiliate col vecio, ma fate aiutar dal zovane
Chi vol provar tropo, no prova niente
Chi ciama Dio no xe contenti; chi ciama el diavolo xe disperai; chi dise ohime' xe inamorai
Chi davanti te leca, de drio te sgrafa
Chi vol star ben, toga le cose come che le vien
Chi no more in cuna, ghe ne impara sempre qualcuna
Chi fa la festa no la gode
Chi ga el manego in man lo dopara
Chi serca rogna, trova rogna
Chi se vol ben poco posto tien
Chi ga bela muger no la xe tuta soa
Chi nasse mato no guarisse mai
Chi ghe n'ha, ghe ne spande
Chi fa a so modo no ghe duol la testa
De nose un saco, ma no piu' de na dona per casa
Dove manca i cavai anca i aseni trota
Dai segni se conosse le bale
Dove no ghe xe ocio, no ghe xe lagrime
Dove che ghe vol fati, no basta parole
De le volte na busia salva la verita'
Dopo l'amaro vien el dolze
Dime chi son, ma no me dir chi gera
Del bon tempo e dela bona zente, no se se stufa mai.
Do gali in t'un ponaro no i pol star
Dopo i confeti se vede i difeti
Dei grandi e dei morti se parla ben
Dove no gh'e' da guadagnar gh'e' da perdare
Dove ghe xe tose inamorae, xe inutile tegner porte serae
El can de tanti paroni el more de fame
El bisogno fa far grandi cose
El pan del mona xe el primo magna'
El nome del minchion xe scrito in ogni canton
El megio xe nemigo del ben
El tempo, el culo e i siori, i fa quel che i vol lori
El fa el mestier de Micielasso: el magna, el beve, el va a spasso
El vol metare el caro davanti ai bo'
El riso nasse ne l'aqua e ha da morir nel vin
El ghe porta l'aqua co le recie
El vin l'e' el late dei veci
El cafe' l'e' bon co tre S: senta', scotando, scrocando
El xe galantomo in casa voda
El vin de fiasco a la sera bon, a la matina guasto
El petegolo xe na spia senza paga
El leto xe el paradiso dei povari
El povar'omo no fa mai ben: se mor la vaca, ghe vanza el fen, se la vaca scampa, el fen ghe manca
El morir xe l'ultima capela che se fa
El vento forte o impizza el fogo o lo destua
El pesse grosso magna el picolo
El naso gusta e la boca patisse
Fa la corte a le vecie se te voi piaserghe a le zovane
Fradeli, corteli; cognade spade
Fortunà come el can in ciesa
Fioi da slevare, fero da rosegare
Ghe xe piu' giorni che luganega
Gato serà diventa leon
I preti fa bogire la pignata co le fiame del purgatorio
I nostri veci ga magna' i caponi e i n'a' lasa' i proverbi
I omeni ga i ani che se sente, le done quei che le dimostra
I dolori xe come i schei, chi li ga se li tien
I preti vive de carne morta, i dotori de carne malada, i avocati de carne rabiada
I difeti xe come i odori: li sente più chi che xe intorno de chi li porta
Le tose lo desidera, le maridà lo prova, le vedove lo ricorda
L'e' tanto poareto che non ga gnanca el fia' caldo
Le maledision le salta de qua e de la', e le finisse nel culo de chi le da
L'amor fa molto, ma i soldi fa tuto
La parola liga l'omo, la corda l'aseno
La roba no xe de chi la fa, ma de chi la gode
Le maridà sa cossa che el xe, le tose crede ch'el sia un zugatolo
Le bestie se trata da bestie
Le done xe sante in ciesa, anzoli in strada, diavoli in casa, civete a la finestra e gazze a la porta
L'amor fa passare el tempo, e el tempo fa passar l'amor
Mai cazzarse nei fati dei altri
No se fa un capel par una sola piova
No ghe xe mai ben che no gabia el so mal
No ghe riceta par la paura
Novo paron, nova lege
Ne una parola dita, ne un saso tirà, no torna piu' indrio
No se ga se no quel che se gode
Ne la malatia, ne la preson, no fa diventar l'omo bon
Ognuno xe fiol de la so azion
Ogni can mena la coa e ogni minchion vol dir la soa
Omo vivo pagara', omo morto ga paga'
Parché la dona la sia perfeta, bisogna che la gabia quatro M: matrona in strada, modesta in ciesa, massera in casa, mata in leto
Parer e no esser, xe come filar e no tesser
Peto picinin, late pegorin
Pati ciari, amiçizia longa
Prima de parlar bisogna fare come el gal, che sbate tre volte le ale prima de cantar
Quando tuti te dise imbriago, va in leto
Quatro oci i vede piu' de do.
Quando manca el gran, le galine se beca
Quando che la muger se mete le braghese, al mario no ghe resta che le cotole
Quando uno xe imbriago, tuti ghe vol dar da bevar
Quando l'aqua la toca el cul, tuti impara a noar
Roba robà come la vien la va
Speta cavalo che l'erba la crese
Se l'invidia fuse febre, tuti n'avrebe
Scoltar, veder e taser, xe tre cose difiçili da far
Se la galina tasese, nissun savaria che la ga fato l'ovo
Saco vodo no sta in pie'
Sto mondo xe 'na gran scala, chi va su e chi va so.
Se una dona xe bela, partorise una putela.
Se volì cognossar una persona, varde' la dona al balo e l'omo al zogo
Tira piu' un pelo de mona, che un par de bo.
Tuti ga el so quarto d'ora
Tuti ga la so ora de mona
Tempo, done e siori, i fa tuti come i vol lori
Tuti gusti xe gusti: ghe era anca quel che ciuciava un ciodo
Un pare mentien sete fioi, sete fioi no xe boni a mantegner un pare
Vin vecio e dona zovane 
Voltite indrio e ti ghe ne vedara' de pezo
Xe megio osel de bosco che de gabia
Xe piu' difiçile far la guardia a 'na femena, ch'a un saco de pulesi
Xe piu' fadiga taser che parlar

Torna all'inizio

Torna a racconti